2014年1月21日 星期二

「减肥日誌」②去醫院見營養師

星期一終於到啦!!!愛擔心的我為了不遲到,特登好早就起身沖凉換衫食早餐,12點準時搭上車出發去威爾斯親王醫院見營養師!

去到威爾斯親王醫院才一點十五分,比預定的時間早了幾乎一個鐘,但因為不懂路,找到公共學院大樓的時候時間便剛好了。

營養研究中心在三漏,地方不大,剛開始的時候要先填一份關於你日常生活和飲食習慣的問卷,例如你幾點食早餐?食d咩?又或者你有冇曾經試過服用任何減肥葯咁。

填到一半就被營養師叫咗去度高磅重同埋測體脂肪。嘻嘻~有d怕醜添,但事實證明咗我真係有1.58m架!

度完坐係梳化等咗一陣,就可以見營養師喇~

營養師揸住我頭先添果份問卷再問得詳細d,好似問卷上只係問你幾時食Lunch,營養師就會問你通常Lunch會食d咩,同埋要舉d例子。(佢問我果時其實我個腦一片空白,咩都唔記得。。。)

清楚曬我既飲食習慣之後,營養師便現場即時幫我設計餐單。佢又攞隻碗出黎話俾我知所謂既“一份”係幾多,又攞隻瓷羹教我度每一餐應該食幾多肉。之後仲好認真咁同我講每一餐應該點食同有d咩係絕對不應該食。不聽唔知,原來我一直中意食既腐竹同豆卜係好唔健康架!!!!

講完一大輪,就到約下一次見面既時間同埋講下成個療程要幾耐。本以為肥咗二十年既我要好似其他係論壇分享過既sis咁要成大半年,但原來我自己既各項指數雖然唔算好靚仔,但每項指數都係係標準內。所以俾心機既一個月就可以達到要求。但營養師都同我講咗,未超標唔代表健康,以我呢個高度同呢個年紀,d指數係可以再低d架。我要繼續努力先得喇!!!!

2014年1月16日 星期四

「減肥日記」① 預約見營養師

我相信每個女仔都當減肥喺自己的終生事業,我自己亦喺咁樣。同好多人一樣,我細細就已經喺一個肉騰騰既小朋友,但因為細個果陣仲有PE堂可以上,加上本人骨架大,肩膀寬,望落去係「壯」多過似「肥」。到咗中學,爹地和媽咪離咗婚後,媽咪要開始返工,冇時間煮飯,所以我基本上一日三餐都喺外食。放暑假的時候,我為了慳多d錢(買單反),好多時候都係係seven或者惠康、百佳求其買d糖啊咁,再唔係就買勁多公仔面返屋企,餐餐都食餐蛋面。

到咗中四,我既體重已經到咗57kg,而我一位當時好好既朋友,佢身高一米七五,但佢都凈係重多我5kg到,就係果個時候,我終於意識到自己有幾大份。於是我即刻上網搵有d咩有效既減肥藥。好快我就係論壇到搵到一個係長沙灣既所謂既減肥神醫,去睇果陣登記姐姐聽到我話減肥都嚇咗一跳,問我:「咁細個就減肥?」我都只可以笑而不語。。。減肥神醫見咗我之後開咗一個月既藥俾我。d藥好勁,一個月我差唔多瘦咗成10斤,但副作用同時都好勁。食咗果d藥之後你會變得完全冇胃口,就算成日唔食嘢都唔會肚餓,而且會訓唔著,仲要係日日都訓唔著,跟住心會跳得好快啦,口乾,食到第三個月我仲有d輕微手震。日日去廁所見到自己好似白粉友咁既樣其實都好驚,因為第三個月果時我已經對自己既體重同身形好滿意,所以我就冇再去複診。

但喺靠絕食得返黎既身形真係keep唔到好耐,唔夠半年,我就完全漲返,仲要肥過以前。苦於冇其他更好既減肥方法,所以我都由得自己既身形肥落去。

但係係前幾日,我係網上見到話有人參加咗中大營養中心既「體重管理療程」,中心會安排你見營養師,幫你設計營養餐單,而且要每星期複診睇下你既進度同調整餐單。而好多參加過既人都話好work,一個月分分鐘瘦到三、四磅之餘又瘦得健康,之後亦都冇反彈,加上中大既收費俾坊間既一d體重管理公司便宜很多,所以搞到我都好蠢蠢欲動,嗱嗱聲send咗個email俾中大營養中心,而佢地都好快覆咗我。之後我都有就收費既問題打去再問得詳細d。

見營養師方面你可以選擇係中環睇或者係沙田睇,但中環就貴d,第一次既診金係$600,之後既每次複診係$300左右,而沙田第一次既診金費係$500,之後每次既複診費係$250﹣400左右。佢既收費唔係複診一次就俾一次錢,而係你睇完第一次後,營養師就會評估你成個療程需時多久,在根據個時間長度收費。而呢筆收費可能會分兩期或者三期,係你第一次複診的時候就要俾第一期既費用喇。譬如我係需要減半年既時間,總共要俾一萬蚊,但分兩期交,咁我第一次複診就要交五千蚊喇(呢筆費用只係譬如,療程既費用係因人而異的)。

我打電話過去問曬我想問既嘢之後我都即刻預約參加呢個療程,星期一我就可以見營養師喇!~\(≧▽≦)/~